Исповедание веры Афанасиево епископа Александрийскаго

1) Кто хощет спасен быти, прежде всих нужда есть, яко да держит истинную веру;
2) Юже аще кто целу и нерастлену не сохранит, без сомнения, во век погибнет.

3) Вера же истинная сия есть: Яко единого Бога во Троици, и Троицу во Единици да почитаем;
4) Ниже смешающе ипостаси, ниже усия разделяюще.
5) Ина бо есть Ипостась Отча, ина Сынова и ина Духа Святаго.
6) Но Отца и Сына и Духа Святаго едино есть Божество, точна слава, совечно величие.
7) Як Отец, так Сын, так и Дух Святый.
8) Несотворен Отец, несотворен Сын, несотворен и Дух Святый.
9) Непостижим Отец, непостижим Сын, непостижим и Дух Святый.
10) Вечен Отец, вечен Сын, вечен и Дух Святый.
11) И обаче не три вечнии, но един вечный.
12) Якоже не три несотворении, ниже не три непостижимии, но един несотвореный и един непостижимый.
13) Подобно всемоги Отец, всемоги Сын, всемоги и Дух Святый;
14) И обаче не три всемогущеи, но един всемогий.
15) Тако Бог Отец, Бог Сын, Бог и Дух Святый;
16) И обаче не три бози суть, но един Бог.
17) Тако Господь Отец, Господь Сын, Господь и Дух Святый;
18) И обаче не три Господие суть, но един Господь.
19) Зане якоже опасно куюждо ипостась Бога и Господа исповедати Христианскою истиною побуждаемся;
20) Тако "три Боги" или "три Господи" рещи правоверным законом возбраняемся.
21) Отец от никогоже есть создан ниже сотворен, ниже порожден.
22) Сын от Отца единого есть; не создан ниже сотворен, но порожден.
23) Дух Святый от Отца и Сына; не создан ниже сотворен, ниже порожден, но исходя.
24) Един убо Отец, не три Отци; един Сын, не три Сынове; един Дух Святый, не три Дуси Святии.
25) И в сей Троици никтоже преди или последи; никтоже вяще или мене.
26) Но все три ипостаси совечны си суть и соточны.
27) Тако яко по всим, якоже уже выше речено есть, и Единица во Троици, и Троица во Единици чтима да будет.
28) Иже хощет убо спасен быти, тако о Троици да мыслит.

29) Но потребно есть к вечному спасению, яко о воплощении такожде Господа нашего Иисуса Христа истинно да верует.
30) Есть убо вера права яко да веруем и исповедуем яко Господь наш [Иисус Христос] Божий Сын, Бог и человек есть.
31) Бог от усии Отчи, прежде век порожденый; и создан от усии матерни, во веце рожденый.
32) Совершеный Бог и совершеный человек, от души разумныя и человеческия плоти сый.
33) Точен Отцу по Божеству, мений Отца по человечеству.
34) Иже аще Бог есть и человек, не двои обаче, но един есть Христос.
35) Един же не обращением Божества во плоть, но приятием человечества в Бога.
36) Един всячески, не смешением усии, но единством ипостаси.
37) Зане якоже душа разумная и плоть един есть человек, тако Бог и человек един есть Христос;
38) Иже пострадал есть о спасении нашем, нисходи во преисподняя, третиим днем воскресе из мертвых;
39) Взыде на небеса, седит одесную Отца, Бога Всемогущаго.
40) Оттуду приидет еже судити живыя и мертвыя.
41) При егоже пришествии вси человеци воскреснути имут с телесы своими;
42) И дадут о делех своих ответ.
43) И иже благая деяша, внидут в живот вечный; иже же злая, во огнь вечный.

44) Сия есть вера истинная, юже аще кто истинно не верует спасен быти не может.